ILEMELA YAWATAMBUA NA KUWATHAMINI WAZEE

Posted on: April 16th, 2018

Halmashauri ya manispaa ya Ilemela itaendelea kuwatambua na kuwathamini wazee wa manispaa hiyo kwa kusaidia upatikanaji wa haki na stahiki muhimu za wazee wote.

Hayo yalisemwa na Mstahiki Meya wa halmashauri ya manispaa ya Ilemela Mheshimiwa Renatus Mulunga wakati wa uzinduzi wa baraza la wazee wa kata ya Mecco ambapo amewahakikishia kuwa manispaa yake itaendelea kuchukua hatua mbalimbali kuhakikisha wazee wa wilaya yake wanapata maslahi na haki zao kwa wakati ikiwemo huduma za matibabu bila ya gharama yeyote na kuwakutanisha pamoja ili waweze kujadili na kuzitafutia ufumbuzi wa pamoja changamoto zote zinazowakabili

‘.. Wazee wangu kwanza nashukuru leo tumeweza kujumuika pamoja, Lakini niwahakikishie kuwa manispaa yangu ya Ilemela itaendelea kuwatambua na kuwathamini kwa kusaidia upatikanaji wa haki zenu na stahiki zenu muhimu ..’ Alisema

Kwa upande wake mwenyekiti wa baraza la wazee kata ya Mecco ndugu Mohamed Yusuph ameishukuru serikali ya awamu ya tano chini Rais wa Jamhuri ya Muungano wa Tanzania Mheshimiwa Daktari John Magufuli kwa kuwatambua wazee kama sehemu ya jamii huku akiipongeza halmashauri ya manispaa ya Ilemela kwa kuendesha mchakato wa kupata mabaraza ya wazee kuanzia ngazi za mitaa, kata na wilaya kitendo ambacho kimempa fursa yeye kuaminiwa na kuchaguliwa na wazee wenzake aweze kuwawakilisha na kushiriki katika kuzitafutia ufumbuzi changamoto zote zinazowakabili kwa kushirikiana na Serikali.

Nae Mratibu wa mabaraza ya wazee wilaya ya Ilemela Bi Neema Kawishe mbali na kufafanua juu ya majukumu muhimu ya baraza hilo amebainisha faida mbalimbali watakazozipata wazee hao kupitia uwepo wa mabaraza ya wazee ikiwemo kutoa nafasi kwa wazee waweze kushauriana na kuishauri serikali juu ya mambo mbalimbali ikiwa ni pamoja na kutetea maslahi yao.

Uzinduzi wa baraza hilo umeenda sambamba na zoezi la ugawaji wa vitambulisho vya huduma za matibabu bure kwa wazee waliohudhuria uzinduzi huo na kupambwa na kauli mbiu ya ‘ UZEE NA KUZEEKA NANI ATAKWEPA ’