ZAIDI YA SHILINGI BILIONI 18 ZA KITANZANIA KUJENGA BARABARA MANISPAA YA ILEMELA

Posted on: June 8th, 2018

Zaidi ya shilingi bilioni 18 za kitanzania zinatarajia kutumika katika ujenzi wa barabara za Manispaa ya Ilemela kwa kiwango cha lami.

Hayo yamebainishwa leo tarehe 08/06/2018 na Mkurugenzi wa Manispaa ya Ilemela Ndugu John Wanga kwenye hafla fupi ya utiaji saini mkataba wa ujenzi wa barabara kati ya Manispaa ya Ilemela na kampuni ya Synohydro Ltd ya China.

Ujenzi wa barabara hizo zenye jumla ya urefu wa kilomita 12.1 utahusisha barabara ya Sabasaba-Kiseke-Buswelu(Kilomita 9.7), Isamilo-Mjimwema(Bigbite, Kilomita 1.2)makutano ya barabara ya Makongoro-Mwaloni Kirumba(Kilomita 1.2) halikadhalika pamoja na uwekaji wa taa za barabarani  na mabirika ya kukusanyia taka.

Akitoa neno la shukrani  katika hafla ya utiaji saini mkataba huo, Mstahiki meya wa Manispaa ya Ilemela, Mhe Renatus Mulunga amesema kuwa hadi sasa shilingi za kitanzania milioni 436 kati ya shilingi milioni 636 zimelipwa fidia kwa wananchi kutoka katika mapato ya ndani ya halmashauri .

Mwakilishi wa kampuni ya Sinohydro Ndugu Jia Bin amesema kuwa ujenzi wa barabara unatarajiwa kuanza Juni 15 mwaka huu, ambapo  utatekelezwa ndani ya miezi 15 na kuahidi kuwa watahakikisha wanamaliza kwa wakati uliokusudiwa na utajengwa kwa ubora wa hali ya juu.

Baadhi ya wananchi waliofika kushuhudia utiaji saini mkataba wa barabara hizo wamepongeza hatua hiyo na  kusema kuwa, kukamilika kwa ujenzi wa barabara hizi kutasaidia kurahisisha usafiri kwa wananchi na mizigo hususani kata ambazo mradi unapita pamoja na kuimarisha huduma za kiuchumi na kijamii kama vile shule, hospitali na masoko.

Mradi wa ujenzi wa barabara hizi unagharimiwa na fedha za mkopo kutoka Benki ya Dunia chini ya mradi wa uendelezaji Miji na Majiji “Tanzania Strategic Cities Project”.

Mstahiki Meya wa Manispaa ya Ilemella Renatus Mulunga (Aliyeketi) akitia saini

 mkataba wa ujenzi wa barabara za Manispaa ya Ilemela

Mkurugenzi John Wanga (mwenye tai) akitia saini mkataba wa ujenzi huku akishuhudiwa na waalikwa

Mstahiki Meya Renatus Mulunga (Katikati) pamoja na mwakilishi wa kampuni ya synohydro (Upande wa kushoto) Ndg. Jia Bin

pamoja na Mkurugenzi  John Wanga(Upande wa kulia)wakipongezana mara baada ya kusaini mkataba 

Kutoka kushoto ni mwakilishi wa kampuni ya Sinohydro Corporation Jia Bin, 

Mstahiki Meya Manispaa ya Ilemela Renatus Mulunga pamoja na 

Mkurugenzi wa Manispaa hiyo John Wanga wakionyesha mkataba wa makubaliano kwa wananchi