WASICHANA 2898 KUNUFAIKA NA CHANJO YA SARATANI YA MLANGO WA KIZAZI

Posted on: April 25th, 2018

Zaidi ya wasichana wasiopungua 2898 katika Manispaa ya Ilemela wanatarajia kunufaika na chanjo ya saratani ya mlango wa kizazi ambayo inaendelea kutolewa katika maadhimisho ya wiki ya chanjo ambayo huadhimishwa nchi nzima, bara na  visiwani.

Akizindua rasmi chanjo ya kuzuia saratani ya mlango wa kizazi na maadhimisho ya wiki ya chanjo kitaifa kwa Wilaya ya Ilemela, Mkurugenzi wa Manispaa ya Ilemela John Wanga ambae alimwakilisha mgeni rasmi Kaimu Mkuu wa Wilaya ya Ilemela Mhe Khadija Nyembo, amesema kuwa lengo la maadhimisho ya wiki ya chanjo ni kuhakikisha kuwa watoto wote wenye umri chini ya miaka mitano ambao hawajakamilisha chanjo wanapata kwani chanjo ni haki ya kila mtoto.

Aidha alisema kuwa katika wiki hii ya chanjo,  Wilaya ya Ilemela  inatarajia kuchanja wasichana wasiopungua 2898 dhidi ya saratani ya mlango wa kizazi.

“Katika wiki hii ya maadhimisho ya chanjo manispaa ya Ilemela tunatarajia kuchanja wasichana wasiopungua 2898 dhidi ya saratani ya mlago wa kizazi”, alisema

Aliongeza kuwa, sambamba na kutoa chanjo ya saratani, manispaa pia itatoa chanjo mpya ya kuzuia ugonjwa wa polio ambayo itatolewa kwa njia ya sindano na sio matone kama hapo awali.

Nae kaimu mganga mkuu wa manispaa ya Ilemela Bi Maria Kapinga amewatoa hofu wazazi juu ya chanjo hiyo ikiwa ni pamoja na kuwataka kuwaruhusu watoto wao kuhudhuria vituo vya kutolea huduma ili waweze kuchanjwa.

Kwa upande wake mwakilishi wa shirika la afya (WHO) aliyehudhuria uzinduzi huo, Ndugu Arlen Galimo ameipongeza halmashauri kwa  uzinduzi huo wa utoaji wa chanjo ya saratani ya mlango wa kizazi amewaasa wahudumu wa afya wa manispaa hiyo kutimiza wajibu wao kwa kuunga mkono jitihada za serikali katika kupambana na magonjwa hayo.
Nchini Tanzania, maadhimisho ya wiki ya chanjo kwa watoto hufanyika kila mwaka wiki ya mwisho ya mwezi wa nne ambapo kwa mwaka huu maadhimisho haya katika Wilaya ya  Ilemela yameambatana na uzinduzi wa chanjo mbili mpya ambazo ni chanjo ya kuzuia saratani ya mlango wa kizazi na chanjo ya sindano ya kuzuia ugonjwa wa polio ikiwa na  kauli mbiu ya ‘JAMII ILIYOPATA CHANJO NI JAMII YENYE AFYA, TIMIZA WAJIBU WAKO’