WANAILEMELA WAADHIMISHA SIKU YA MASHUJAA KWA USAFI NA KUPIMA AFYA

Posted on: July 25th, 2024

Jamii ya Ilemela ikiongozwa na Mwakilishi wa Mkuu wa Wilaya ya Ilemela Adv.Mariam Msengi ambaye pia ni katibu tawala wa Wilaya hiyo wameadhimisha kumbukizi ya siku ya mashujaa kwa kufanya usafi katika eneo la kituo cha afya Buswelu ambapo huduma mbalimbali za afya zimetolewa bure.

Akizungumza wakati wa mazoezi hayo Adv.Msengi amemshukuru Mhe.Rais wa Jamhuri ya Muungano wa Tanzania kwa kuendelea kutoa fedha nyingi katika maboresho ya sekta ya Afya ambapo kituo cha Afya Buswelu ni moja ya matokeo chanya ya uboreshaji huo .

“  Kituo hiki cha Buswelu kwa sasa kinatoa huduma kwa wananchi wengi ambao hapo awali walikuwa wakitembea umbali mrefu kupata huduma za Afya .”

Amewataka wananchi wa Ilemela kutumia fursa hiyo ya kupata huduma za afya zinazotelewa bure katika kituo hicho huku akisisitiza afya ni mtaji katika kuishi na ni wajibu wa kila mmoja kujijali kwa kujifuatilia kwani taifa linahitaji nguvu kazi imara.

Nae diwani wa kata ya Buswelu Mhe.Sarah Ngw’ani amepongeza uongozi wa Wilaya ya Ilemela kwa maadhimisho hayo na kusisitiza kuwa ni muhimu yaendelee kwa faida ya vizazi vya sasa na vijavyo kuelewa mashujaa walivyojitoa kwa uzalendo kupigania taifa lao.

Akihitimisha hafla hiyo Mganga Mkuu wa Manispaa ya Ilemela Dkt.Maria Kapinga amewataka wananchi wa Ilemela kujijengea mazoea ya kupima afya zao mara kwa mara kufahamu hali zao ili kujua namna bora ya kuenenda na hali za kiafya walizonazo.

“  Sasa hivi magonjwa yasiyoambukiza yanakuja kwa kasi sana ,watu wengi wana presha wana kisukari lakini hawajijui ,wengi wanakuja hospitali hali zikiwa mbaya kabisa muepukane na hayo kwa kupima afya mara kwa mara hata kama hujisikii kuumwa.Kinga ni bora kuliko tiba.”

Agnes Masalu ni mkazi wa Lukobe ni mmoja wa wananchi waliopata huduma yeye anapongeza uongozi wa Wilaya kuwajali watu wake na kuomba utaratibu huo uendelee.