WAGANGA WA TIBA ASILI NA MBADALA WATAKIWA KUWALINDA WENYE ULEMAVU WA NGOZI

Posted on: June 28th, 2024

Waganga wa tiba asili na mbadala ndani ya Manispaa ya Ilemela wametakiwa kuwalinda watu wenye ulemavu wa ngozi na kuwafichua matapeli na waovu  wanaojifanya waganga wa kienyeji na kusababisha mauaji

Rai hiyo imetolewa na mratibu wa tiba asili na tiba mbadala wa manispaa ya Ilemela  Bi Lilian Davis Chiguma wakati wa kikao kazi cha kujengeana uwezo na kubadilishana uzoefu baina ya waganga wa kienyeji na wataalam wa afya wa manispaa ya Ilemela

Bi Chiguma ameongeza kusema kuwa Serikali itawachukulia hatua kali za kisheria waganga wanaopiga ramli chonganishi na tiba potofu zinazochochea mauaji na kusababisha vifo kwa watu wenye ulemavu wa ngozi maarufu albino

“Hakuna aliyependa kuwa albino hii imetokana na sababu za kiuumbaji za Mungu, Sasa ikitokea ukashawishika au ukashiriki katika kupanga au kushiriki mauaji yao Serikali haitakuacha salama hatua kali zitachukuliwa dhidi yako”, Alisema

Aidha Bi Chiguma akawataka waganga hao kujisajili na kufuata maadili ya tiba mbadala huku akisisitiza kuwa waganga kazi yao ni kutibu na sio kuuwa

Neema Kavishe ni afisa ustawi wa jamii anaeratibu kitengo cha watu wenye ulemavu na wazee  amewataka waganga wa manispaa ya Ilemela kuhakikisha wanakuwa mabalozi wa kupinga  vitendo vya kikatili dhidi ya albino pamoja na kuwafichua watu wote wenye imani potofu ya kuamini kuwa kuuwa albino na kuchukua viungo vyake ni njia rahisi ya kujipatia utajiri

Kwa upande wake Mganga wa tiba asilia kutoka kata ya Buswelu Ndugu Stephano Joachim Lusana amewataka waganga wenzake kushirikiana na Serikali kupiga vita mauaji ya albino kwani vitendo hivyo vikiendelea vitatia doa waganga wengine wasiohusika pamoja na kushindwa kuendelea na utoaji wa huduma za kila siku kutokana na makatazo yanayoweza kutolewa na Serikali