UMMY WAYAYU: "TUKUMBUKE HAKI NA WAJIBU"

Posted on: January 28th, 2025

UMMY WAYAYU: “TUKUMBUKE HAKI NA WAJIBU”

Mkurugenzi Ummy Wayayu amewakumbusha watumishi wa umma kuwa haki inaenda sambamba na wajibu kwa kuwataka watumishi wa umma kuhakikisha wanatimiza wajibu wao ili waweze kupata haki zao za msingi na hivyo kupunguza manung’uniko ndani ya taasisi.

Mkurugenzi Ummy ameyasema hayo tarehe 28 januari 2025 wakati wa kikao cha baraza la wafanyakazi la manispaa ya Ilemela lililoketi kwa ajili ya kufanya mapitio ya utekelezaji wa bajeti inayoendelea ya 2024/2025 sambamba na kujadili rasimu ya mpango na bajeti ya mwaka wa fedha 2025/2026.

“Niwakumbushe watumishi wenzangu kuwa ili kuweza kupata haki zenu hamna budi kuhakikisha mnatimiza wajibu wenu, kwani vitu hivi vinaenda sambamba”. Amesema ummy

Wakichangia katika kikao hicho cha baraza, wajumbe wameipongeza rasimu hiyo ya mpango na bajeti na kuomba iwe ni yenye kutekelezeka kwa kuzingatia  maslahi ya watumishi wa Ilemela 

Sambamba na pongezi hizo katika nyakati tofauti wajumbe walipata wasaa wa kuzijadili changamoto mbalimbali zinazowakabili ambazo hupelekea kuathiri utendaji kazi wao ikiwemo swala la uoungufu wa vifaa, usafiri, n.k na kuomba kufanyika kwa tathmini ya majengo ya shule ambayo yamechoka ili yaweze kukarabatiwa.

Nae katibu tawala wa wilaya ya Ilemela, Wakili Mariam Msengi amempongeza mkurugenzi kwa kuitisha kikao hicho ambacho kipo kwa mujibu wa sheria huku akiwapongeza wawakilishi wa watumishi kwa kuziwasilisha changamoto zao kwa uwazi zinazolenga kuboresha utekelezaji wa majukumu yao

Aidha wakili Mariam amemtaka mkurugenzi kuhakikisha kuwa changammoto zilizowasilishwa zinatafutiwa ufumbuzi ili zisije kujirudia katika vikao vingine.

Goodluck Luginga ambae nia afisa kazi mkoa wa Mwanza amepongeza kwa namna kikao kimeendeshwa ambapo yeye amewakumbusha wajumbe wa baraza kuhakikisha wanatoa mrejesho wa masuala yaliyojadiliwa katika kikao kwa watumishi wanaowawakilisha ili waweze kufahamu masuala ambayo yamejadiliwa.

Mkurugenzi ummy alihitimisha kikao hicho kwa kuwasisitiza juu ya suala la uwazi na kuwataka watumishi kuwa huru kuzifikisha kwake changamoto zinazowakabili ili kuepusha mpasuko ndani ya taasisi.

“ Kunapokuwa na changamoto zozote tufahamishane ili tusitengeneze mipasuko katika taasisi yetu”, Ummy alisema.