SHILINGI MILIONI 501 ZATOLEWA KWA VIKUNDI VYA WANAWAKE, VIJANA NA WALEMAVU KWA MWAKA WA FEDHA 2018/2019

Posted on: July 11th, 2019

Halmashauri ya Manispaa ya  Ilemela kupitia Idara ya maendeleo ya jamii Kwa mwaka wa fedha 2018/2019 imefanikiwa kutoa jumla ya Shilingi 501,000,000(Shilingi Milioni mia tano na moja tu) kwa vikundi 186 vya wanawake, vijana  na  walemavu.

Kati ya vikundi hivyo, vikundi 148 vya wanawake vimepatiwa   kiasi  cha Tsh 397,000,000, vikundi vya vijana 33 vimepatiwa jumla  ya Shilingi 92,000,000 na vikundi  5 vya walemavu vimepatiwa jumla ya  Shilingi 12,000,000.

Jumla ya  fedha iliyo rejeshwa hadi sasa ni takribani kiasi  cha Shilingi  62,000,000 huku pesa zingine zikiendelea kurejeshwa kulingana na mkataba  wa marejesho wa fedha hizo.

Kikundi cha Masaligula ni mojawapo ya kikundi kinachofaidika  na mkopo huu kutoka Halmashauri kilichopo Kata ya Sangabuye  na hujishughulisha na shughuli ya mradi wa uuzaji wa dagaa pamoja na mgahawa.

Mhasibu wa kikundi hicho Bibi Elizabeth Bahati amesema kuwa hii ni mara ya pili kikundi chao kinapata mkopo huu ambapo awamu ya kwanza walipata  fedha kiasi cha Shilingi Milioni mbili na awamu ya pili wamepata mkopo wa Shilingi Milioni tatu.

Aidha aliongeza kwa kusema kuwa, mkopo huu umewasaidia kukuza biashara yao kwani hapo awali alikuwa wakilangua dagaa na kutembeza kwenye mabeseni lakini kwa sasa wanaweza kununua dagaa kwenye magunia toka kwa wavuvi  na uwauzia wanaotembeza kwenye mabeseni.Aliongeza kuwa mafanikio mengine yaliyopatikana kutokana na mkopo huu, ni  kuwa wameweza kuwasomesha watoto kupitia fedha wanazopata kupitia biashara hiyo.

Pia amewashauri wakinamama kujinga na vikundi mbalimbali ili waweze kupata mkopo huo kwani hauna riba na ni wenye masharti nafuu huku  akiwaasa wale ambao wamekuwa hawarejeshi mkopo kuhakikisha wanarejesha kwa wakati ili kujenga uaminifu.

Pamoja na hayo kwa niaba ya wanufaika wa mkopo huo,Bi Elizabeth ameishukuru serikali kwa kuanzisha utaratibu huo wa utoaji wa mkopo usiokuwa na riba kwani umewarahisishia maisha na kuwaletea maendeleo.

Fedha hii inayokopeshwa  kwa wanawake,vijana na walemavu ni  asilimia 10 ya fedha kutoka makusanyo ya ndani ya halmashauri na hukopeshwa kwa muda wa mwaka mmoja bila riba ikiwa ni utekelezaji wa Ilani ya Chama Tawala ya mwaka 2015-2020.