Shilingi Milioni 154 zakusanywa kukabiliana na changamoto ya madawati katika shule za msingi za Ilemela

Posted on: June 1st, 2022

Fedha kiasi cha Tshs. Mil 154 zimepatikana katika chakula cha hisani kilichoandaliwa kwa lengo la kukusanya fedha kwa ajili kukabiliana na changamoto ya madawati katika shule za msingi za Ilemela.

Fedha hizo zilizopatikana zitatumika kutengeneza madawati 2200 ambapo kila dawati moja litakaliwa na watoto watatu na kila dawati litagharimu kiasi cha Tshs, 70,000.

Harambee hiyo ambayo iliandaliwa na Mkuu wa Wilaya ya Ilemela Mhe. Hasan Masala na kuhudhuriwa na wadau mbalimbali wa maendeleo ambapo Mgeni rasmi alikuwa Mkuu wa Mkoa wa Mwanza ilikuwa na lengo la kupata madawati 1500

Akifungua hafla hiyo, Mkuu wa Mkoa wa Mwanza Mhandisi Robert Gabriel amempongeza Mhe. Masala kwa maono hayo ya kuwashirikisha wadau katika masuala ya maendeleo na kuwataka Wakuu wa Wilaya zingine kuiga jambo hilo.

Mkurugenzi wa Manispaa ya Ilemela, Mhandisi Modest Apolinary alisema kuwa katika harambee hiyo Halmashauri imechangia kiasi cha Shilingi Mil. 35 kutoka katika mapato ya ndani ambapo fedha hiyo ni kwa ajili ya kutengeneza madawati 500