RAI YATOLEWA KWA WAFANYABIASHARA SOKO LA KIMATAIFA LA MWALONI KIRUMBA KUTUNZA VIFAA VYA USAFI

Posted on: September 4th, 2025

 Kiongozi wa Mbio za Mwenge wa Uhuru Kitaifa 2025 Ndg. Ismail Ali Ussi ametoa rai kwa wafanyabishara wa soko la samaki la mwaloni Kirumba juu ya utunzwaji wa vifaa vya usafi ili viendelee kuweka mazingira ya Soko la Kimataifa la Samaki – Mwaloni lililopo Halmashauri ya Manispaa ya Ilemela katika hali nzuri ya usafi.

Ametoa rai hiyo tarehe 26 /08/2025  wakati akikabidhi vifaa vya usafi, nakuzindua malori mawili  na kijiko kimoja  cha kubebea taka ikiwa ni miongoni  mwa miradi iliyotembelewa na mbio za Mwenge wa Uhuru.

‘’Vifaa hivi tulivyokabidhi leo vitasaidia  kuimarisha na kudumisha hali ya usafi katika soko hili, niwasisitize mvitunze ili usafi wa mazingira ya Soko uendelee kuimarika ” amesisitizaNdg. Ussi

Akisoma taarifa ya usafi na mpangilio wa soko kwa niaba ya Mkurugenzi wa Halmashauri ya Manispaa ya Ilemela Ndg. Johannes Buberwa amesema kuwa mafanikio yaliyopatikana  katika huduma ya usafi na udhibiti wa taka ngumu katika soko hilo ni pamoja na uhifadhi na utunzaji wamazingira kwa kudhibiti uzalishaji wa hewa inayotokana na taka zenye asili ya kibaiolojia, kudhibiti magonjwa ya mlipuko yanayotokana na taka na  kuweka mazingira katika hali ya usafi wakati wote.

“Tunamshukuru Mhe. Rais wa Jamhuri ya Muungano waTanzania Dkt. Samia Suluhu Hassan kwa kuona umuhimu wa kuzingatia usafi wa mazingira katika masoko, barabara na mitaro ya maji katika Wilaya yetu” alimalizia Ndg. Buberwa

Vifaa vya usafi vilivyokabidhiwa  pamoja na uzinduzi wa Malori 2  na Kijiko 1 cha kubebea taka vimegharimu shilingi 719.960 ambavyo vitasaidia kudumisha usafi katika soko hilo