MKUU WA WILAYA YA ILEMELA ALIPONGEZA BARAZA LA MADIWANI

Posted on: May 8th, 2017

MKUU WA WILAYA YA  ILEMELA ALIPONGEZA BARAZA LA MADIWANI

Mkuu wa wilaya ya Ilemela Mheshimiwa Daktari Leonard Masale amelisifu na kulipongeza baraza la madiwani la manispaa hiyo kwa namna linavyoshughulikia matatizo ya wananchi na kuweka maslahi ya umma mbele katika kutekeleza shughuli za kimaendeleo.

Hayo ameyasema wakati wa kikao cha baraza la madiwani kilichofanyika katika ukumbi wa halmashauri hiyo kwa kupokea na kuzijadili shughuli na miradi iliyofanyika kwa robo ya tatu

‘… Ndugu zangu madiwani kwanza niwashukuru sana na naomba nikiri mheshimiwa mwenyekiti baraza lako ni la maendeleo hata maswali yanayoulizwa ni ya kujenga ukienda mabaraza mengine saa nzima wanajadili maslahi ya madiwani nyie mnajadili maslahi ya wananchi ninawapongeza na sasa nimethibitisha ule usemi wenu kwamba Ilemela ni yetu, Tushirikiane kuijenga …’ Alisema

Aidha Mheshimiwa Daktari Masale ameshukuru kwa ushirikiano anaoupata kwa kuungana pamoja katika vita dhidi ya madawa ya kulevya na katika kuwaletea wananchi wa Ilemela maendeleo huku akitaka kuharakishwa kwa kuanzishwa jukwaa la wanawake la wilaya hiyo

Kwa upande wake mwenyekiti wa kikao hicho na Naibu Meya wa manispaa hiyo mheshimiwa Shaban Maganga mbali na kushukuru kwa pongezi hizo amemuhakikishia mkuu huyo wa wilaya kuwa manispaa yake itaendelea kuwa chemchem ya maendeleo kwa kuweka maslahi ya umma mbele na kuongeza ushirikiano na umoja katika kuwatumikia wananchi

Nae mkurugenzi wa manispaa hiyo ndugu John Wanga amesema kuwa atahakikisha anashirikiana na wataalamu wake katika kutekeleza maelekezo yote waliyokubalina katika kuleta maendeleo ya haraka na yenye tija kwa wananchi huku akiasa ushirikishwaji wa wananchi katika kutafuta maeneo ya utekelezaji wa miradi mbalimbali ikiwemo ofisi za kata ambazo zimeshatengewa bajeti

‘… Niwaombe madiwani tukatafute maeneo ya kujenga ofisi zetu na mkiangalia kwenye bajeti yetu mtaona tumetenga fedha za kujenga ofisi hizo …’ Alihitimisha