MKUU WA WILAYA ILEMELA AZINDUA BARAZA LA BIASHARA LA WILAYA

Posted on: March 27th, 2019

Mkuu wa Wilaya ya Ilemela Mhe.Severine Lalika  jana tarehe  25.03.2019 amezindua rasmi  baraza la biashara kwa Wilaya ya Ilemela.

Akizindua baraza hilo, Mhe Mkuu wa Wilaya, alisisitiza suala la ushirikiano baina ya sekta binafsi na sekta za umma katika kukuza  uchumi wa nchi hususani  katika   Wilaya ya Ilemela.

“Ninawasihi kushirikiana katika uendeshaji wa baraza hili katika hali ya maelewano kwani sekta binafsi na sekta za umma zinategemeana kwani  sekta ya biashara  ina mchango mkubwa  katika kukuza uchumi”, alisisitiza.

Aidha aliwasisitiza wajumbe kuhakikisha wanaibua changamoto mbalimbali zinazoikabili sekta ya biashara na kuzigeuza na kuwa fursa ili kukuza sekta hii.

Wakichangia  mjadala mara baada ya kuundwa kwa baraza hilo, wajumbe walishauri kuwa upo umuhimu wa kutolewa elimu juu ya masuala ya kodi mbalimbali kwa wajumbe ili kuweza kuwa na uelewa wa pamoja na pia walisisitiza uwepo wa vikao vya  mara kwa mara.

Nae Mstahiki Meya wa Manispaa  ya Ilemela, Mhe.Renatus Mulunga aliwashukuru wajumbe kwa ushirikiano wao, na kuwasihi kuwa na ushirikiano wa kutosha ili kuweza kukuza sekta ya biashara Ilemela.

Dhumuni  kuu la uanzishaji wa baraza hili la bishara ni kuimarisha  mfumo wa majadiliano kati ya serikali na sekta binafsi kwa ngazi zote za utawala ili kuchochea ukuaji wa uchumi kupitia majadiliano na vikao vya kisheria.