MKURUGENZI ILEMELA AFUNGUA MAFUNZO YA UBORESHAJI WA DAFTARI LA KUDUMU LA WAPIGA KURA

Posted on: August 6th, 2019

Mkurugenzi wa  Manispaa  ya Ilemela , John Wanga, ambae pia ni  Afisa  Mwandikishaji  wa  jimbo la Ilemela leo amefungua  rasmi mafunzo  ya uboreshaji  wa daftari la kudumu la wapiga Kura kwa watendaji wa kata ambao wanafahamika kama maafisa waandikishaji  wasaidizi ngazi ya Kata yatakayochukua siku mbili za tarehe 06-07/8/2019.

Akifungua Mafunzo hayo, Mkurugenzi amewataka waandikishaji wasaidizi ngazi ya kata kuhakikisha wanafuatilia na kusikiliza mafunzo haya kwa umakini kwani kazi hii ya uboreshaji wa dafatri ni nyeti na ni kwa maslahi ya maendeleo ya nchi.

Mafunzo haya yanayotolewa na waandikishaji wasaidizi ngazi ya jimbo yanahusisha mfumo mzima  wa  namna   ya zoezi zima la uandikishaji  ambapo mfumo huu umegawanyika katika maeneo matatu ambayo ni uandikishaji wa mwananchi mpya kabisa, uboreshaji wa taarifa za      mpiga kura kwenye daftari  (hii ni iwapo mwannachi alihama eneo la makazi au iwapo taarifa zilikosewa)pamoja na kumuondoa mpiga kura kwenye daftari kutokana na sababu mbalimbali kama vile kifo.

Mafunzo haya pia yamehusisha kuapishwa kwa waandikishaji wasaidizi ngazi ya kata, namna ya ujazaji wa fomu mbalimbali pamoja na namna ya kutumia sanduku linaotumika kubeba vifaa    mbalimbali ambavyo vimeunganishwa na kufanya kazi  pamoja kwa ajili ya kuingiza taarifa binafsi za mpiga kura ( BVR KIT-Biometric  Voters  Registration Kit)

Mara baada ya kukamilika kwa mafunzo haya, mafunzo yatakayofuatiwa yatatolewa kwa mtendaji ambae atahusika na uingizaji wa taarifa za wapiga kura katika mfumo wa kuandikisha wapiga kura(BVR Kit operator)  pamoja na waandikishaji wasaidizi ambayo yatafanyika kwa siku 2 za tarehe  10-11/08/2019.

Zoezi la  uboreshaji wa daftari la wapiga kura katika jimbo la Ilemela   litaanza rasmi  mnamo tarehe 13/08/2019  na litadumu kwa muda wa siku 7 hivyo kukamilika siku ya tarehe 19/8/2019 na zoezi hili litaendeshwa katika kata zote 19 za Manispaa ya Ilemela.