MANUSURA LUSIGALIYE ACHAGULIWA KUWA NAIBU MEYA

Posted on: August 11th, 2023

Baraza la Madiwani limemteua kwa awamu ya tatu Mhe.Manusura Lusigaliye Diwani wa  Kata ya Buzuruga  kuwa  Naibu Meya wa Manispaa ya Ilemela ambapo amepata kura  23 za Ndio sawa na asilimia 92 huku kura moja ikiwa ya hapana na kura 1 imeharibika.

Uchaguzi huu wa Naibu Meya umefanyika kwa mujibu wa kanuni za kudumu za Manispaa Kifungu Na.7(3) kifungu kidogo ambapo kila mwaka  kutakuwa na Mkutano wa Mwaka wa Halmashauri ambapo moja ya ajenda ni uchaguzi wa Naibu Meya.

Mhe.Manusura amewashukuru wajumbe kwa kumchagua kwa kura za ndio 23 na kuwaahidi kuendelea kushirikiana nao katika masuala ya maendeleo kata kwa kata pamoja na kusimamia suala zima la mapato na matumizi ya fedha za Halmashauri.

Sambamba na hilo Mstahiki Meya Renatus Mulunga ameunda kamati za Kudumu ambazo ni Kamati ya Huduma, Afya na Elimu, Kamati ya Mipangomiji, Kamati ya UKIMWI, na Kamati ya Fedha ambapo wajumbe waliopendekezwa walichagua Wenyeviti wa Kamati hizo.

Kwa upande wa Kamati ya Huduma ,Mwenyekiti aliyechaguliwa ni Mhe. Hussein Magera wa Kata ya Ibungilo, Mipangomiji ni Mhe.Godlisten Kisanga wa Kata ya Mecco, na kwa mujibu wa Sheria kamati ya UKIMWI huongozwa na Naibu Meya na Kamati ya Fedha huongozwa na Mstahiki Meya wa Manispaa.