MANISPAA YA ILEMELA YAKABIDHIWA JUMLA YA VITABU 47,946

Posted on: April 25th, 2018

Jumla ya vitabu 47,946 vimekabidhiwa leo tarehe na 25/04/2018 kwa Halmashauri ya Manispaa ya Ilemela na Mkuu wa  mkoa Mwanza Mhe. John Mongella kwa niaba ya Mhe. Rais Dkt.John Pombe Magufuli.

Vitabu vilivyotolewa ni vya darasa la kwanza hadi la tatu ikiwa ni vitabu vya sanaa na mazingira (9620), afya na mazingira(9620), Kuandika(9620), Kusoma (9620), Maarifa ya jamii (4733) na kiingereza (4733).

Akikabidhi vitabu,Mhe. Mongella, amewaelekeza walimu wakuu wa shule zitakazopatiwa vitabu hivyo kuhakikisha wanavigawa kwa wanafunzi na sio kuvihifadhi stoo.

“Hatutegemei baada ya leo tukaenda shule tukakuta mkuu wa shule ameweka vitabu hivi stoo”, Alisema

Pamoja na hayo, amesisitiza kuwa vitabu hivyo wapewe watoto wasome na isije ikatokea mtoto wa darasa la kwanza hadi darasa la tatu hajui kusoma wala kuandika kwani lengo la hivi vitabu ni kuondoa kitendawili cha kuwa na watoto wasiojua  kusoma,kuandika na kuhesabu.

Aidha Mkuu wa Mkoa amewaelekeza waratibu elimu na wadhibiti ubora wa elimu ,kufuatilia ubora wa utoaji elimu, ufundishaji na ujifunzaji wa watoto.

Nao wanafunzi pamoja na walimu waliowawakilisha wengine wameishukuru serikali kwa kuwapatia vitabu hivyo ambavyo vitasaidia kuongeza ufanisi wa ufundishaji kwa walimu na ujifunzaji  kwa walimu.

Afisa Elimu, vifaa na takwimu Ndugu Joseph Mrimi amesema kuwa vitabu hivi vitapunguza idadi ya upungufu wa vifaa vya kujifunzia na kuongeza ufaulu kwa wanafunzi pamoja na kupunguza tatizo la kusoma,kuandika na kuhesabu

Vitabu hivi vitaanza kugawiwa kuanzia kesho tarehe 26/04/2018 katika shule 74 za msingi zilizopo kwenye  kata 19 za Manispaa ya Ilemela.