MADIWANI WATAKIWA KUSHIRIKIANA NA WATENDAJI UKUSANYAJI WA MAPATO

Posted on: January 30th, 2025

Madiwani wa halmashauri ya manispaa ya Ilemela wametakiwa kushirikiana na watendaji wa ngazi za mitaa na kata kuhakikisha wananchi wanalipa tozo mbalimbali za halmashauri ili kuongeza mapato kwaajili ya utekelezaji wa miradi ya maendeleo

Rai hiyo imetolewa na mstahiki meya wa manispaa ya Ilemela Mhe Renatus Mulunga wakati wa kikao cha baraza la madiwani kwa ajili ya kupokea na kujadili taarifa za kata kilichofanyika tarehe 30 januari 2025 ambapo amefafanua kuwa ili shughuli za maendeleo ziweze kutekelezeka kwa ufanisi ni lazima kasi ya ukusanyaji mapato iongezeke

'.. Madiwani wenzangu tuhakikishe tunashirikiana na watendaji wetu katika suala la ukusanyaji wa mapato, ukusanyaji wa mapato si jambo la kisiasa, na wapiga kura wetu wanatutegemea sana katika kutekeleza Ilani ya uchaguzi, miradi yote tulioahidi kutekeleza haiwezi kukamilika kama hatutakusanya mapato vizuri ..' Alisema

Aidha Mhe Mulunga amewataka viongozi na watendaji wa manispaa hiyo kuhakikisha wanahamasisha jamii juu ya kuwapeleka watoto shule kwa madarasa ya awali, darasa la kwanza na kidato cha kwanza ili uwezekezaji uliofanywa na serikali ya Rais Dkt Samia Suluhu Hassan katika sekta ya elimu uweze kuwa na tija

Kwa upande wake mwakilishi wa mkurugenzi wa manispaa ya Ilemela ambae pia ni afisa utumishi mkuu Ndugu Teulas Egidy akasema kuwa manispaa ya Ilemela inaendelea na utekelezaji wa miradi mbalimbali ya maendeleo katika maeneo tofauti na kwamba changamoto chache zilizosalia zitamalizwa kupitia bajeti ya mwaka huu wa fedha hivyo kuwaomba kuendelea kushirikiana ili wananchi waweze kupata maendeleo

Mhe Sara Ngh'wani ni diwani wa kata ya Buswelu, akichangia katika kikao hicho ameishauri manispaa ya Ilemela kuona namna bora ya kutumia ujenzi wa maduka yanayozunguka shule za manispaa hiyo kama suluhu katika kukabiliana na changamoto za uzio sanjari na kuongeza mapato huku afisa elimu takwimu msingi wa manispaa hiyo Mwalimu Johanes John akisema kuwa sera haijakataza wala kuruhusu uamuzi huo na badala yake idara yake itafuatilia kuona namna bora ya utekelezaji wa mawazo hayo

Nae katibu wa CCM wilaya ya Ilemela Ndugu Hasan Milanga ameipongeza manispaa ya Ilemela kwa ununuzi wa vifaa na mitambo ya ujenzi wa barabara pamoja na uanzishaji wa kituo kwa ajili ya ulipaji na ukusanyaji wa mapato katika ofisi ya kata ya Nyamanoro huku akishauri kuanzisha vituo vya aina hiyo katika maeneo mengine kurahisha ulipaji wa kodi za serikali kwa wananchi

Manispaa ya Ilemela imefanya vikao vyake vya robo ya pili kuzipatia ufumbuzi kero na changamoto mbalimbali zinazokabili wananchi wake.