JAMII YA ILEMELA YATAKIWA KUTUNZA MAZINGIRA

Posted on: March 11th, 2023

Jamii ya Ilemela imetakiwa kutunza mazingira pamoja na kuwa na utamaduni wa kufanya usafi katika maeneo yanayowazunguka ili kujiepusha na magonjwa ya milipuko

Rai hiyo imetolewa na afisa mazingira wa manispaa ya Ilemela Bi Jonathan Nyabugumba wakati wa zoezi la kufanya usafi na utoaji wa elimu juu ya kutunza mazingira na urejeshaji wa taka ngumu katika mialo ya manispaa ya Ilemela ambapo amewataka wananchi kujenga utamaduni wa kusafisha maeneo yao wanayoishi pamoja na kutunza mazingira yanayowazunguka ili kujikinga na magonjwa yanayosababishwa na mazingira machafu kama vile kipindupindu na magonjwa ya tumbo

‘.. Tusipotunza mazingira yetu tutapatwa na magonjwa ya milipuko, Na huu ni wajibu wetu sisi wananchi sio mpaka Serikali itusimamie wapo mawakala katika maeneo yetu lakini na sisi tuna wajibu wa kufanya katika utunzaji wa mazingira ..’ Alisema

Aidha Bi Nyabugumba mbali na kuwashukuru wadau wa mazingira kutoka taasisi za chuo kikuu cha Dar es salaam, Arena recycling na Emedo ya jijini Mwanza amewataka wananchi kuendelea na utamaduni wa kufanya usafi hata baada ya taasisi hizo zinazotoa elimu ya mazingira kumaliza muda wao wa kazi ndani ya Ilemela pamoja na kusisitiza mawakala wa usafi kutekeleza wajibu wao katika maeneo yao ya kazi

Bahati Mayoma ni mhadhiri kutoka chuo kikuu cha Dar es salaam shule ya sayansi akua na teknolojia ya uvuvi, yeye amewataka wananchi kutunza mazingira ya fukwe za ziwa viktoria ikiwa ni pamoja na kuhakikisha hakuna uingizaji wa plastiki ndani ya ziwa hilo, utekelezaji wa shughuli za kibinadam kando ya vyanzo vya maji sanjari na kuziasa BMU kusimamia wajibu wake ikiwemo usafi wa ziwa na mazingira yake pamoja na kubainisha tafiti mbalimbali zinazoelezea juu ya namna ziwa viktoria na mazalia yake vinavyoathiriwa na uharibu wa mazingira

Khamis Masimba ni mjumbe wa Serikali ya mtaa wa Mihama na January Lucas ni mwenyekiti wa BMU ya mwalo wa Igombe wote kwa pamoja wameshukuru kwa elimu iliyotolewa ya utunzaji wa mazingira na urejeshwaji wa taka ngumu huku wakiahidi kuwasimamia wananchi wenzao katika kuhakikisha mazingira yanatunzwa na kulindwa

Elimu juu ya utunzaji wa mazingira na urejeshaji wa taka ngumu imetolewa na taasisi ya ARENA kwa kushirikiana na chuo kikuu cha Dar es salaam kwa wananchi na viongozi wa mialo ya Kirumba, Mihama, Igombe na Kayenze ndani ya manispaa ya Ilemela kwa lengo la kupunguza athari za mabadiliko ya tabia nchi, uharibifu wa mazingira na kuzuia magonjwa ya mlipuko yanayosababishwa na mazingira machafu.