ILEMELA YAUNGANA NA WAFANYAKAZI NCHINI KUADHIMISHA SIKU YA WAFANYAKAZI DUNIANI

Posted on: May 1st, 2024

Watumishi wa Halmashauri ya Manispaa ya Ilemela wakiongozwa na Mkurugenzi wao Bi Ummy Wayayu wameungana na wafanyakazi nchini kusherehekea siku ya wafanyakazi duniani inayoadhimishwa kila ifikapo tarehe Mosi mwezi Mei ya kila Mwaka.

Mgeni rasmi wa  Maadhimisho hayo ambayo kimkoa yamefanyika  Wilaya ya Ilemela Mhe Said Mtanda, Mkuu wa Mkoa wa Mwanza  amewapongeza wafanyakazi bora na kuwataka kuendelea kufanya kazi kwa bidii kwa uaminifu nidhamu na maarifa makubwa

Sambamba na hilo Mhe Mtanda akatoa wito kwa  wafanyakazi kutojihusisha na vitendo vinavyoenda kinyume na maadili ya utumishi wa umma ikiwemo rushwa kwani vitendo hivi vinachafua taswira ya utumishi wa umma na vinaondoa haki ya wananchi kupata huduma mbalimbali, na kusisitiza kuwa hatavumilia vitendo hivyo vinavyopelekea wananchi kukosa huduma stahiki na kwa wakati unaotakiwa.

Pamoja na hayo Mhe Mtanda  amekemea tabia ya mazoea ya kupeana zawadi ifikapo Mei Mosi bila kuzingatia sifa na uhodari wa mfanyakazi huyo, huku akiamini kuwa  waliopata ufanyakazi hodari  ni wale wanaostahili ili iwe   kichocheo kwa wafanyakazi wengine.

Mkuu wa Mkoa  amewataka wafanyakazi kuhakikisha wanatafuta vyanzo vingine vya mapato vilivyo halali vya  kuwaongezea kipato kuliko kutegemea mshahara ambao haujawahi kutosha.

Mhe Mtanda amehitimisha kwa kuhimiza suala la heshima kazini baina ya mwenye cheo kikubwa na mwenye cheo kidogo huku akisisitiza kufanya kazi kwa upendo na kushirikiana na kuepuka kufanyiana fitna.

Maadhimisho ya mei mosi 2024 yamepambwa na kauli mbiu  isemayo, "Nyongeza ya mshahara ni msingi wa mafao bora na kinga dhidi ya hali ngumu ya maisha"