ILEMELA YASAINI MKATABA WA UJENZI WA BARABARA YA KILOMITA 12.8

Posted on: September 24th, 2023

Halmashauri ya Manispaa ya Ilemela chini ya Mstahiki Meya Mhe. Renatus Mulunga, na Mkurugenzi Adv. Kiomoni Kibamba wamesaini mkataba wa ujenzi wa Barabara yenye urefu wa Kilomita 12.8 ambayo itajengwa kwa gharama ya Shilingi Bilioni 23.48 fedha za kitanzania.

Barabara zitakazojengwa ni za Buswelu-Nyamadoke-Nyamhongolo kwa urefu wa Km 9.5 na Barabara ya Buswelu-Busenga-Cocacola itajengwa kwa urefu wa Km 3.3

Hafla ya kusaini mkataba huo imefanyika tarehe 23/09/2023 katika Ukumbi wa Mikutano wa Kimataifa wa Mwalimu Julius Nyerere (JNICC) jijini Dar es Salaam, mbele ya Waziri wa Nchi Ofisi ya Rais (TAMISEMI) Mheshimiwa Mohamed Mchengerwa (Mb)

Mhe. Mchengerwa amewataka wakurugenzi wa Halmashauri kuhakikisha miradi inasimamiwa vizuri ili kuhakikisha mikataba inatekelezwa kwa wakati na viwango vya juu.

Sambamba na hilo Mhe Mchengerwa amewataka wakandarasi kuhakikisha wanaingia site mara moja  na kukamilisha kazi kwa muda uliopangwa.

Utekelezaji wa ujenzi wa Barabara hizi utafanyika ndani ya kipindi cha miezi 15, chini ya mkandarasi Nyanza Road Works  ambapo mkandarasi mshauri M/s NIMETA Consult (T) Ltd ndie atakaesimamia kazi hiyo kwa muda wa miezi 28 kwa maana miezi 16 ya kuwa site na miezi 12 ya matazamio.