ILEMELA YAPONGEZWA KUONGOZA ZOEZI LA URASIMISHAJI MAKAZI NCHINI

Posted on: April 7th, 2020

Halmashauri ya manispaa ya Ilemela imepongezwa kwa kufanya vizuri katika zoezi la urasimishaji makazi na umilikishaji wa ardhi ambapo hadi sasa imefanikiwa kuandaa michoro ya mipangomiji 58,000, kupima viwanja 52,000 na kumilikisha jumla ya viwanja 72,000.

Akizungumza katika viwanja vya manispaa hiyo, Naibu waziri wa wizara ya  ardhi, nyumba na maendeleo ya makazi Mhe Dkt Angeline Mabula amewapongeza viongozi wa Manispaa ya Ilemela kwa kasi ya uendeshaji wa zoezi hilo ukilinganisha na halmashauri nyingine nchini ambazo zimekuwa zikisuasua katika kutekeleza zoezi hilo la urasimishaji wa makazi kwa kupima na kumilikisha viwanja vichache

‘.. Naipongeza Halmashauri ya Manispaa ya Ilemela, kwani kitaifa inaongoza kwa kupanga, kupima na kumilikisha ardhi.’ Alisema

Aidha Naibu Waziri Mabula amewataka wananchi nchini kuhakikisha wanaitumia vizuri fursa ya urasimishaji makazi kwa kuhakikisha wanapima maeneo yao, wanalipia gharama za hati miliki ili waweze kumilikishwa kwani zoezi hilo ni endelevu na linalenga kuwanufaisha wananchi wote wa hali zote ndani ya Wilaya ya Ilemela na maeneo mengine nchini.

Kwa upande wake afisa ardhi na mipango miji wa manispaa ya Ilemela Ndugu Shukran Kyando amesema kuwa walipewa lengo la kuandaa michoro ya mipango miji 16,000 kupima viwanja 16,000 na kumilikisha viwanja16,000 tofauti na uhalisia ambapo hadi sasa wameweza kuandaa michoro, kupima na kumilikisha hati 27,000 ambayo ni zaidi ya lengo kusudiwa.

Nae afisa mipango miji mkoa wa Mwanza Deogratias Kalimenze ameelezea kuwa sera ya ardhi ya mwaka 1995 na sera ya makazi ya mwaka 2000 zote kwa pamoja zimeanisha kuwa maeneo yote ya mjini ambayo hayakupangwa na kupimwa kwa utaratibu unaokubalika yatarasimishwa na kumilikishwa.

Moja ya wananchi waliokabidhiwa hati miliki kutoka mtaa wa Nyasaka Bi Stella George ameishukuru Serikali na kupongeza zoezi hilo kwani litasaidia kutatua migogoro ya ardhi isiyokuwa ya lazima.

Jumla ya hati 1508 zilitolewa kwa wananchi wa Manispaa ya Ilemela na Naibu Waziri wa ardhi Nyumba na Maendeleo ya Makazi.