Ilemela yaanza utekelezaji anwani za makazi

Posted on: February 12th, 2022

Halmashauri ya manispaa ya Ilemela imeanza rasmi utekelezaji wa zoezi la anwani za makazi kwa kuendelea na vikao kazi  vya kuwawezesha wataalam wake watakaohusika na zoezi hilo kwa ngazi mbalimbali ambao tayari wameingia mtaani leo kuanza kazi hiyo.

Akizungumza wakati wa kikao kazi na watendaji wa kata,wenyeviti wa mitaa na wataalam wa anwani za makazi wa Halmashauri Mkuu wa Wilaya Mhe.Hassan Masala amesisitiza ushirikiano imara kwa wahusika wote na kuhakikisha zoezi linafanyika kwa ufanisi na kukamilika kwa wakati sambamba na maagizo ya serikali ya awamu ya sita inayoongozwa na Rais wa Jamhuri ya muungano wa Tanzania Mhe.Samia Hassan Suluhu ya kukamilisha zoezi hilo ifikapoMei 2022.

“Ushirikiano ndio nguzo ya kufanikiwa kwetu,lengo letu ni kufanya kazi hii kwa ufanisi  na kukamilisha kwa wakati “amesema Mhe.Masala.

Nae Mkurugenzi wa manispaa ya Ilemela Mhandisi Modest Apolinary ametoa rai kwa wananchi wote wa manispaa ya Ilemela kuwa tayari kupokea zoezi hilo kwani ni muhimu kwa wote ,litarahisisha huduma mbalimbali za kijamii kutolewa kwa urahisi na kuondoa migogoro ya ardhi huku akiwataka wananchi hao kutunza na kulinda miundombinu hiyo punde itakapokamilika.

“Utunzaji na ulinzi wa miundo mbinu ya anwani za makazi ni jukumu la wananchi wote ili zoezi letu liwe la mafanikio ya kudumu.Matangazo na elimu mbalimbali za kuhusu masuala yote ya anwani za makazi yataendelea kutolewa kwa njia mbalimbali ikiwemo redio ili kuleta uelewa wa pamoja ndani ya jamii yetu ya Ilemela”