HATI 178 ZATOLEWA KWA WANANCHI WA ILEMELA

Posted on: February 16th, 2019

Naibu Waziri wa Ardhi, Nyumba na Maendeleo ya makazi Mhe.Dkt. Angeline Mabula na Mbunge wa jimbo la Ilemela leo tarehe 16.02.2019 ametoa hati 178 kwa wakazi wa Ilemela ambao walifanyiwa urasimishaji wa makazi yao.

Akitoa hati hizo amewahimiza wananchi ambao hawajalipia gharama za kupata hati kuhakikisha wanalipia ili waweze kupata hati kwani kupimiwa ardhi pasipo kuwa na hati haitasaidia.

"Kupimiwa ardhi, kuonyeshwa mipaka peke yake haitakusaidia kama hutakuwa na hati ambayo ndio salama ya miliki yako",alisistiza.

Aidha amesema kuwa kila mwananchi atii sheria za nchi, kufanya kazi kwa bidii, na kulipa kodi na moja wapo ikiwa ni kodi ya pango la ardhi ili kuweza kuiletea nchi maendeleo kupitia kodi hizo.

Pamoja na hayo ameipongeza Ilemela kwani imevuka lengo lililowekwa na wizara la kurasimisha makazi 16,000 na badala yake Ilemela imeweza kupima viwanja 42,000.

Halikadhalika amesema kuwa wale wasiokuweo katika mpango huu wa urasimishaji pamoja na wasio katika mipangomiji kutakuwa na zoezi la utoaji leseni ya makazi ambayo itakuwa ni ya kipindi cha miaka mitano na itagharimu kiasi cha Tsh.5000 ukiongeza na gharama zingine za upimaji ambazo zitabainishwa hapo baadae.

Utoaji huo wa leseni hizo za makazi utafanyika ili kuweza kuwatambua wale wote ambao hawapo katika mipango miji na ambao hawakupitiwa na zoezi hili la urasimishaji na kuwaingiza katika mfumo wa ardhi na hapo baadae watapatiwa hati ya miaka 99.

Nae Diwani wa kata ya Mecco ambapo zoezi la utoaji hati lilifanyika, Mhe Godlisten Kissanga amewahimiza wananchi kuhakikisha wanalipia hati ili waweze kupatiwa hati ambazo zitawasaidia katika masuala mbalimbali.

Nae Mkurugenzi wa Ilemela John Wanga amewasihi wananchi hao pindi wapatapo hati hizo wahakikishe kuwa wanazitumia vizuri kwa mambo yenye kuleta tija kwao na maendeleo ya Taifa.

Hadi sasa Ilemela imetoa jumla ya hati 15,786 ambayo ni sawa na asilimia 38% ya wananchi wote waliopimiwa.