HAI WAAHIDI KUWA MABALOZI WAZURI WA MANISPAA YA ILEMELA

Posted on: October 3rd, 2023

Mwenyekiti wa Halmashauri ya Wilaya ya Hai Mhe.Edmund Rutaraka kwa niaba ya Baraza la Madiwani ameishukuru Manispaa ya Ilemela  kwa ushirikiano mzuri waliotoa katika ziara yao ya mafunzo  na kuahidi kuwa  mabalozi wazuri wa Ilemela huku wakihimiza kuendeleza ushirikiano uliopo kati ya Baraza la madiwani pamoja na watumishi.

Ameyasema hayo wakati akihitimisha ziara yao ya mafunzo ya siku moja waliyofanya katika Manispaa ya Ilemela tarehe 03 Oktoba 2023 iliyokuwa na lengo la kujifunza juu ya masuala ya ukusanyaji mapato, uwekezaji kupitia vikundi vya wanawake, vijana na watu wenye ulemavu.

Sambamba na hilo wametoa pongezi kwa kikundi cha vijana cha  jogooland ambacho kilipatiwa mkopo na halmashauri  kwa namna ambavyo kimeweza kujisimamia na kufanikisha mradi wao wa kuku na kuweza kurejesha mkopo waliopatiwa kwa takriban asilimia 90.

Wakiwa Ilemela, Halmashauri ya Hai pia wametembelea mradi wa ujenzi wa Barabara ya Bigbite Michungwani inayojengwa kwa kiwango cha mawe  itakayokuwa na urefu wa Mita 643 katika kata ya Nyasaka mtaa wa Terrazzo  kupitia fedha za tozo za mafuta

Nae Mstahiki Meya wa Manispaa ya Ilemela amelishukuru Baraza la Halmashauri ya Wilaya ya Hai kwa kuamua kuja kujifunza Ilemela kwani inadhihirisha ni namna gani Ilemela inaendelea kukua na kufanya vizuri katika nyanja mbalimbali.