BEZI WAASWA USAFI MAADHIMISHO YA SIKU YA AFYA NA LISHE MTAA KWA MTAA

Posted on: September 13th, 2024

Wakazi wa mtaa wa Bezi ambao ni eneo la kisiwani linalopatikana ndani ya kata ya Kayenze wamenufaika na huduma zilizotolewa katika siku ya afya na lishe ya mtaa kwa kupatiwa huduma za wajawazito, matibabu ya watu wazima na watoto, elimu ya uzazi wa mpango, ushauri wa lishe bora,chanjo sambamba na jiko darasa.

Akizungumza na wakazi hao Bi.Joyce Robert Afisa lishe wa kituo cha Afya Buzuruga amesema ni wajibu wa watu wote kuzingatia usafi katika maandalizi ya chakula chochote kabla ya kula ili kuepukana na maradhi yatokanayo na uchafu kama kuhara na kipindupindu.

" Naongelea lishe bora,bila usafi ni kazi bure."

Aidha wananchi wa Bezi wameaswa kuwa na mpangilio mzuri wa ulaji hasa kwa watoto kwa kuzingatia mchanganyiko na uwiano sahihi wa chakula kutoka makundi yote matano ya vyakula .

"..Tunawakaribisha sana kwa wakati mwingine tena kwani ujio wenu umeturahisishia safari za kuvuka kwenda hospitali za nchi kavu tumefurahi na kujisikia kumbe hata sisi wa visiwani tunakumbukwa.." amesema Starico Said mkazi wa mtaa wa Bezi .