AWAMU YA KWANZA UCHANJAJI MIFUGO KUANZA TAREHE 03 JULAI, KUKU ELFU 70 KUCHANJWA

Posted on: July 2nd, 2025

Imeandaliwa na Kitengo cha Mawasiliano ya Serikali- Ilemela

Halmashauri ya manispaa ya Ilemela inatarajia kuanza utekelezaji wa zoezi la uchanjaji wa mifugo tarehe 03 Julai 2025 zoezi ambalo litadumu kwa muda wa takriban wiki mbili ikiwa ni utekelezaji wa mkakati wa serikali wa kupunguza na kutokomeza vifo vya mifugo vitokanavyo na magonjwa ya homa ya mapafu ya ng'ombe, sotoka ya mbuzi, kideri kwa kuku, ndui na mafua makali ya kuku.

Katika manispaa ya Ilemela zoezi hili la uchanjaji litatekelezwa kwa awamu mbili ambapo awamu ya kwanza itahusisha uchanjaji wa kuku wa asili wanaokadiriwa kufikia elfu sabini huku awamu ya pili itahusisha uchanjaji wa ng'ombe na mbuzi sambamba na uwekaji wa hereni kwa ajili ya utambuzi na itaanza mara baada ya kupokea vifaa vingine kama friji, pikipiki sindano vishkwambi n.k

Akikabidhi chanjo hizo kwa maafisa mifugo leo tarehe 02 Julai,2025, Ndugu Petro Joseph ambae alimwakilisha kaimu mkurugenzi amesema kuwa manispaa ya Ilemela imekwishapokea chanjo  elfu 23 za ng'ombe, chanjo elfu 70 za kuku na chanjo elfu 28 za mbuzi pamoja na  baadhi ya vitendea kazi.

"Niwatake kuhakikisha kuku wote wanaofugwa ndani ya manispaa ya Ilemela wanachanjwa, sambamba na kutoa elimu kwa wafugaji ikiwa ni pamoja na kuzingatia sheria na taratibu wakati wa utekelezaji wa zoezi hili", amesisitiza Ndugu Peter

Naye Dkt. Nelson Rugaimukamu, afisa mifugo wa halmashauri ya manispaa ya Ilemela amemshukuru Rais Mhe. Dkt. Samia Suluhu Hassan kwa kutoa chanjo hizi bure na kutoa rai kwa wananchi kutoa ushirikiano kwa wataalamu wakati wa  zoezi hili  kwani itawasaidia kupunguza gharama za matibabu kwa mifugo yao na kupunguza uwezekano wa kupata magonjwa yanayosababishwa na kukosekana kwa chanjo

 Akizungumza kwa niaba ya maafisa mifugo wa halmashauri Ndg. David Wanoka, afisa mifugo kata ya Kayenze amesema kuwa amezipokea chanjo hizo na  ameahidi kuwa  watahakikisha zoezi la utoaji wa chanjo hizo linafanyika kwa ufanisi katika kata zote.

Kampeni hii ya kitaifa ya chanjo na utambuzi wa mifugo ilizinduliwa rasmi na Rais Mhe Samia Suluhu Hassan Juni 16,2025 mkoani Simiyu itatekelezwa kwa miaka mitano kuanzia mwaka wa fedha 2025/2026.

MWISHO