BARAZA LA MADIWANI ILEMELA LAPONGEZA UTEKELEZAJI WA MIRADI YA MAENDELEO ROBO YA PILI

Posted on: January 30th, 2025

BARAZA LA MADIWANI ILEMELA LAPONGEZA UTEKELEZAJI WA MIRADI YA MAENDELEO ROBO YA PILI

Baraza la madiwani Ilemela likiongozwa na mstahiki meya wa Halmashauri ya Manispaa ya Ilemela Mhe.Renatus Mulunga limepongeza taarifa ya utekelezaji wa miradi ya maendeleo kwa kipindi cha robo ya pili ( Oktoba - Desemba ) kwa mwaka wa fedha 2024/2025 ambayo inayoonyesha kata zote 19 zinazounda Manispaa hiyo kupata mgao katika kutekeleza miradi yao.

Akitoa taarifa ya mkurugenzi  wakati wa kikao hicho kaimu Mkurugenzi wa Manispaa hiyo ndugu Egidy Teuras amesema Manispaa ya Ilemela imefanikiwa kukusanya shilingi bilioni 7.01 sawa na asilimia 47 ya lengo la mwaka  na sawa na asilimia 93.8 ya lengo la nusu mwaka wa fedha 2024/2025.

Ndugu Egidy ameongeza kwa kusema kuwa kiasi cha shilingi milioni 270.96 fedha za mapato ya ndani zimetumika katika utekelezaji wa miradi ya maendeleo ndani ya kata 19 za manispaa ya Ilemela katika kipindi cha robo ya pili ya mwaka 2024/2025

Nae katibu tawala wa wilaya ya Ilemela, wakili Mariam Msengi amechangia kwa kusema kuwa masuala ya ukusanyaji mapato ni muhimu kwa wilaya yetu kwani yataiwezesha manispaa kufikia malengo yake ya utekelezaji wa miradi sambamba na kuwahudumia wananchi wetu na kuwaletea maendeleo ambayo ni kiu ya kila mtu.

Akijibu swali la Mhe.Issa Mwalikila Diwani wa kata ya Kayenze lililohoji kuhusu mpango wa dharura wa TARURA katika utengenezaji wa barabara ya kuelekea Lukobe kata ya Kahama, meneja wa TARURA Mhandisi Sobe Makonyo amesema barabara hiyo yenye urefu wa kilomita 2.15 imekwisha kamilika kwa marekebisho yaliyofanyika kwa kutumia magreda ya Manispaa ya Ilemela shughuli iliyotekelezwa mnamo Januari 28 ,2025.

Akihitimisha baraza hilo Mhe.Mulunga amewaasa wanaIlemela kupeleka watoto shule kwa kuzingatia umuhimu wa elimu katika maisha ya kila siku huku akimuagiza mkurugenzi wa Manispaa hiyo kuhakikisha anaweka mpango wa kuanza kujenga madarasa ya maghorofa.

"Ujenzi wa madarasa ya maghorofa utatuwezesha kutumia ardhi yetu vizuri,majengo mengi katika eneo dogo."