WITO WATOLEWA KWA WAZAZI NA WALEZI KUHAKIKISHA WATOTO WANACHANJWA

Posted on: December 2nd, 2022

Wazazi na walezi Wilayani Ilemela wametakiwa kuhakikisha kuwa watoto wote wenye umri kuanzia mwezi 0 hadi miezi 59 wanapatia chanjo ya polio ili kuwakinga na ugonjwa huu ambao hauna tiba kwani chanjo hii ni salama kabisa.

Wito huo umetolewa na Ndugu Said Kitinga (Katibu Tawala wa Wilaya ya Ilemela) akimuwakilisha Mkuu wa Wilaya ya Ilemela wakati wa uzinduzi wa kampeni ya chanjo ya matone ya polio awamu ya nne ambayo ilifanyika katika kituo cha afya Buzuruga

“Chanjo hii ni salama, hivyo niwaase wazazi na walezi kuhakikisha  watoto wenye umri wa chini ya miaka mitano (mwezi 0 hadi miezi 59) wanapatiwa  chanjo na pasiwepo na mtoto wa kuachwa kupelekwa kwenye chanjo ili kuweza kuwakinga watoto wetu kwani nao wana haki ya kuishi”, alisema Ndugu Kitinga

Aidha aliendelea kutoa wito wa kuupiga vita ugonjwa huu wa polio, kwani ni ugonjwa mbaya kwasababu hauna matibabu na dawa yake ni chanjo hivyo mtoto mdogo asipochanjwa unamuweka katika hali hatarishi ya kupata ugonjwa huu ambao hupelekea kupooza au kifo.

“Serikali inaendelea kutenga fedha kwa kuwashirikisha wadau mbalimbali ikiwemo Shirika la Afya duniani na Shirika la UNICEF katika kuhakikisha wananchi wanakuwa na afya bora kuanzia wakiwa watoto wadogo”, alisema Ndugu Kitinga

Sambamba na hayo amewapongeza wakinamama waliojitokeza kwani itakuwa chachu kwa wakinamama wengine ili waweze kujitokeza katika zoezi la chanjo  huku akitoa tahadhari kwa watu wanaohusisha mazoezi ya chanjo na taarifa ambazo sio rasmi, wanatumia mitandao ya kijamii kutoa taarifa potofu matokeo yake huleta taharuki katika mazoezi ya kitaifa na kuwataka  iwapo itatokea mtu mwenye nia ovu taarifa itolewe kwa viongozi

Prisca James mwenye watoto wanne akitokea kata ya Mecco ni mmoja wa wazazi waliofika katika kituo cha Afya  kwa ajili ya kumleta mtoto wake ili apatiwe chanjo ya Polio kwani ameelimishwa umuhimu wake hivyo amewataka wakina mama kujitokeza kwa wingi kwani chanjo ni salama na haina madhara yoyote

Damaris Dawson mratibu wa chanjo kituo cha afya Buzuruga, ametoa wito kwa wakina mama kujitokeza kwani chanjo ni salama huku akiomba ushirikiano kwa wazazi na walezi watakaokuwa nyumbani kwani wataalam wa afya wanapita nyumba kwa nyumba kwa ajili ya kutoa chanjo hiyo.